政情：鼠患憂慮 天花漏水 議員捉食衞局講數
政府用咗逾一年時間為大圍街市裝修，期間需關閉街市八個月，以安裝冷氣系統工程，直到尋日終於完工，而部分檔戶亦率先入場驗收。但礙於疫情導致人流減少，而檔戶亦要多畀一筆冷氣費，原本嘅檔戶會唔會踴躍搬返嚟唔在講，有議員落場視察，發現仲有好多問題未解決，例如天花漏水，同埋仲用舊式坑渠蓋，恐爆鼠患添！
議員容海恩（Eunice）同葛珮帆（EQ）分別喺社交平台上載影片，都係希望政府以不同嘅形式，協助因街市裝修而長期停業嘅商販，幫商販渡過難關。此外，佢哋都話將會約見食物及衞生局反映街市問題，以及代商販同政府「講數」喎。唔知局長陳肇始點拆招呢？
疫下人流少 盼提高減租幅度
Eunice話用咗八年時間先至爭取到街市安裝冷氣，往後檔販同市民都唔需要再「焗桑拿」，但有檔販擔心街市停業太耐，就算復業，人流都係會減少。雖然政府之前同街市商戶「傾掂數」，但Eunice話當時係未有疫情嘅情況，所以希望政府能夠按個別情況彈性處理，同埋聆聽市民嘅聲音。佢將會喺下個禮拜嘗試約見食衞局，希望可以延長免收冷氣費嘅期限，或者提高減租嘅幅度。
咁街市商戶又點睇呢？大圍街市互助委員會主席香松穩就話，大圍街市重啟後一年享有半租優惠、政府亦會豁免頭三個月嘅冷氣費。但有商戶擔心疫情下人流減少，希望政府提供更多支援。
促資助購置雪櫃等生財工具
EQ喺影片中就話，明白政府處理疫情都用咗唔少錢，但強調大圍街市嘅商販都好耐冇營業，少不免要政府幫吓手。有見及此，佢聽日就會聯絡食衞局，按商販嘅情況向政府提出，包括資助商販購置雪櫃等生財工具、延長減租期間等訴求。
雖然裝咗冷氣係好事，但EQ話街市內都仲有好多事項需要改善喎。佢尋日親身到街市視察，話街市內有好多曱甴，加上坑渠蓋仲係沿用舊式嘅「長條形」，而非網狀設計，擔心會有食物殘渣跌落去，繼而引起鼠患問題。佢仲話部分商販入街市驗收舖位嘅時候，仲發現天花板有漏水嘅情況。EQ話沙田區鼠患嚴重，街市嘅衞生問題有待改善，食衞局仲有唔少手尾要執之餘，相關部門都需要繼續跟進呀！