中環出更：組合屋3年僅建89伙 謝偉銓鬧爆
本港地小人多，公屋平均輪候時間更升至五年半，早前政府為咗解決「住屋難」問題，推出短中長期房屋政策。當中屬於短房策嘅組合屋計劃「南昌220」由上個月底開始入伙，但建築、測量、都市規劃及園境界議員謝偉銓（Tony）就喺社交媒體出貼文炮轟，話呢個項目只提供八十九個單位，而且搞咗超過三年，實在係太慢同太少喇。
呢個組合房屋計劃，都比預期入伙時間遲咗成半個月。其實組合屋本身最大嘅好處就係「快」，之但係最終都用咗成三年幾嘅時間先至落成到，對於班劏房戶嚟講，咪一樣係「遠水不能救近火」，難怪Tony會詐晒型啦。
促善用閒置官地
Tony希望政府吸取經驗，加快對其他過渡性房屋項目嘅支援同審批，又批評政府唔可以單靠私人業主捐地同依賴非政府組織去興建，因為借番嚟嘅地始終有時限咁話。
其實政府依家仲有好多閒置官地，Tony覺得應該要善用，政府亦應該一手包辦，大規模咁興建，話咁先至可以幫到更多基層市民啊。
卓妮