中環出更：陳雙幸：硬幣般小裝置 防老友記走失
家有一老，如有一寶，唔好以為長者年紀大就會同時代脫節，其實好多長者都識得運用資訊科技，咁如果係一啲患有腦退化嘅老友記又點算好呢？香港科技大學計算機科學及工程學系教授陳雙幸，早前喺一個網上論壇分享，佢同社福機構合作設計嘅一個系統，長者只要佩帶一個恍如硬幣大小嘅裝置，任何人都可以透過下載嘅軟件，接收裝置嘅信號繼而上載系統，老友記一旦走失咗，都可以搵到佢所身處嘅位置。
陳雙幸又話，呢個系統亦可以喺交通燈、交通工具或者街上嘅店舖安裝感應器，就可以更有效咁搵到蕩失路嘅長者。針對新冠肺炎疫情，陳雙幸話研發另一種小巧嘅穿戴式裝置，透過智能手機，就可以分析長者當日外出嘅各個地點，有冇確診者涉足其中，從而提醒大家要做好風險管理。
黃克強：科技為長者服務帶來突破
同場嘅香港科學園公司行政總裁黃克強，就話科技應用為長者服務帶嚟前所未見嘅突破，令溝通過程變得更方便快捷，例如「遙距醫療」為長者提供遙距診症、「智能健康監測及訓練」則幫助長者、社福機構或照顧者，利用科技自行或者遙距監測長者健康狀況；「智能機械人」更可協助住喺院舍嘅長者致電親友進行視像通話，機械人亦都會同長者對話，提供生活資訊。
安老事務委員會主席林正財話香港人口老化係事實，不過唔少長者較年輕人更懂得掌握科技，使用電腦同智能手機都相當嫻熟。然而喺資訊爆炸嘅時代，長者點樣喺海量嘅訊息當中，搵到正確同有用嘅訊息，就係另一回事啦。所以佢希望各方專家能夠喺呢方面動吓腦筋，如何喺資訊流通嘅當下，去幫助長者分辨訊息以應付生活所需。
卓妮