政府地區工程出晒名慢，其中就包括早在十幾年前，已經提出建設、用來連接炮台山油街至鰂魚涌海裕街嘅東區走廊約兩公里長行人板道工程。但事實上，呢個工程由一二年《港島東海旁研究》中提出，到一六年土木工程拓展署展開三階段社區參與工作，再到舊年委聘工程顧問展開設計，預料出年年底展開工程，要到二四年底起先分階段完成。計計吓，等到落成嗰陣已經耗時十幾年，土木工程拓展署署長劉俊傑真係唔可以再歎慢板喇，市民都唔知要等到何年何月先等到條板道吖！
