政情：陳恒鑌：對醫護杯葛檢測感詫異
全民檢測計劃喺日前展開，但最近社會上就有唔少爭拗，有啲人甚至話係將此事「政治化」，議員陳恒鑌（Ben）、香港醫務委員會執照醫生協會副會長唐繼昇，及醫管局員工陣線副主席羅卓堯日前就一齊出席一個電台節目，就是否參加全民檢測展開辯論，其中Ben就對醫護人員呼籲市民杯葛今次檢測感到詫異，認為係絕對唔應該做嘅事，但羅卓堯則就回應話係希望用數字去迫使政府改善抗疫策略。
節目期間Ben就提到，現時政府有資源做全民檢測，唔明白為何員工陣線要反對，除高危群組，其他市民同樣可以去做，加上講明係自願性，應該要由市民自己決定，唔明為何作為醫護人員要呼籲市民杯葛，擔心如此落去，將永遠走唔出困局。唐繼昇同樣都話全港參加檢測先至可以搵出病源，切斷傳播鏈，認為有關團隊唔好發出不正確資訊，影響市民抉擇。
對此，羅卓堯認為政府遲遲都唔願封關，現時更於冇做前提措施嘅情況下進行全民檢測，成效存疑。又認為政府由始至終都冇聆聽佢哋意見，杯葛係想讓政府知道個數字係點，從而逼使佢哋改善現時策略。