政情:林群聲獲委任公開大學校長

公開大學校長黃玉山任期明年三月底屆滿,大學校董會尋日宣布,委任城市大學特別項目總監林群聲接任下任校長,任期四年,由明年四月一日生效。

做過城大副校秘書長

雖然林群聲自九四年就喺城大工作至今,仲做過副校長同秘書長,但其實佢同公開大學都頗有淵源,原來佢喺二○一一年至一七年期間,就擔任過公開大學校董會成員。難怪校方話,遴選委員會經過多輪遴選同會面之後,一致推舉林群聲做下任校長啦!

林群聲接受任命嗰陣就話,好榮幸有機會服務公開大學,成為第六任校長,仲話會同所有教職員、學生同校友緊密合作,共同建立最優秀嘅教學環境喎。校董會及校長遴選委員會主席黃奕鑑對於林嘅加入都表示歡迎,仲深信對方嘅傑出學術成就同豐富管理經驗,能夠帶領大學繼續發展,同達致大學追求卓越嘅目標。

另外,公開大學為咗消除公眾誤解而決定改校名,早排就邀請社會各界為新校名畀建議,引發社會熱烈討論。不過,計埋校內討論同立法會審議都要差唔多兩年嘅時間,睇嚟呢個重任都要交畀林群聲上任之後處理啦!

第一手消息請下載on.cc東網iPhone/iPad/Android/Windows Phone Apps