政情：頭兩輪使大咗抗疫基金閂水喉
本港各行各業自第三波疫情爆發以嚟再次陷入困頓，坊間亦一直有呼聲要求政府推出第三輪抗疫基金，至尋日終於有消息傳出，政府將會喺月內向立法會財務委員會提交第三輪抗疫基金文件申請撥款，但聽聞今次將會「閂水喉」，涉款金額會大縮至幾百億元，但會針對被勒令停業多時嘅行業處所優先資助。消息人士仲話，「大家今次唔好期望太高，全民派錢唔會再有o架喇」。照咁講，政府今次撳住個荷包派津貼，莫非因為之前兩次抗疫基金政府亂批補貼，連「零」員工公司都批資助搞到使大咗所致？
所謂「屋漏偏逢連夜雨」，本港自七月起爆發第三波疫情以嚟，戲院、美容、健身等部分行業處所再次捲入停業漩渦，行業可謂命懸一線。據悉，政府將推出嘅第三輪抗疫基金嘅金額會大減，聽聞更會比第二輪抗疫基金嘅一千三百億元少好多，估計會係一千億元之下，好可能只得幾百億元金額支援今次嘅目標行業。
「全民再派一萬蚊」唔使諗
被問到點解今次政府要閂水喉時，消息指主要因為前兩次抗疫基金發放後，造成政府好大財政壓力，單係今個財政年度嘅頭四個月已經有成逾一千八百億元赤字，所以第三輪基金嘅資助金額就要睇緊啲。
另一消息人士更直言，今次主要針對受疫情影響閂咗好耐嘅行業，仲話政府今次係抱住「最慘最風雨飄搖嘅行業就幫一幫」嘅心態，所以都呼籲大家有定心理準備，好似有意見要求「全民再派一萬蚊」就唔使諗啦，坦言「唔好太高期望」啊。
議員斥冇幫到實處嘥資源
至於議員陳恒鑌（阿Ben）就鬧爆政府之前嘅抗疫基金「係又派、唔係又派」，好似超市賺到笑又批資助、部分有物業收租嘅財團都冇減過租，但申請補助又批畀佢，反而最水深火熱嘅自僱基層因為冇強積金戶口而被拒申請補助，阿Ben大鬧政府冇幫到實處，簡直係浪費資源，佢希望再推新一輪抗疫基金，一定要用得其所啊。
據消息指，第三輪抗疫基金原計劃本月初會交上財會申請撥款，並估計一旦準備好文件就會好快交上財會審議。對此，財委會主席陳健波回覆本報查詢時則指，暫未收到有關方面通知將會遞交文件。