中環出更:立會大樓增保安 加裝閘機防撞欄

立法會大樓舊年遭示威者破壞,今年又有議員喺會議室裏面掟「臭彈」,引發連串保安問題。立法會行政管理委員會尋日召開閉門會議,主席梁君彥會後指,大樓將加強保安措施,包括地下至二樓嘅電梯位置增加約八至十部閘機、機身設有一點八米高玻璃板,而大樓外圍亦增設防撞欄杆。消息指,有關開支將由行管會及政府各承擔一半。

有助控制人流

自從立法會遭衝擊後,行管會就搵咗保安顧問提供意見,增加閘機目的係為咗控制人流,到時一共會有六個位置增加閘機,包括地下至二樓電梯前往會議室同會議廳位置、議員入口及公眾入口,會視乎每個位置闊度而決定,每個位置約兩至三部閘機,會以拍卡形式進入,但玻璃就由半個人咁高伸延至一點八米。

梁君彥指,任何保安措施都會帶來不便,但對安全帶來好處。被問到會唔會需要趕及新一年度會議開始前完成工程,梁話視乎工程進度,由於部分工程由政府建築署處理,亦有部分由立法會處理,因此涉及嘅開支仍須待政府安排。另部分議員入口將會喺九月五日至九月底關閉,以便進行相關工程。

過往會有議員喺點人數期間,為咗唔想流會就由一出電梯開始跑去會議廳。嚟緊加咗閘機,議員變相要過埋閘先可以開始跑,唔知一班議員會唔會諗定應對良策呢?

卓妮

第一手消息請下載on.cc東網iPhone/iPad/Android/Windows Phone Apps