中環出更：憂囡囡赴美讀書易染疫 施榮懷：香港較安全

香港中華廠商會永遠名譽會長施榮懷嘅細女早前已經返咗香港，受疫情影響新學期都冇得返美國上堂，惟有留喺屋企透過網絡遙距上課，但上堂時間難免因時差影響而要日夜顛倒。美國疫情持續唔穩定，問到會唔會擔心囡囡之後返美國讀書會蒙受染疫風險？施榮懷就話當然會擔心，仲話覺得依家美國嘅疫情都未控制得好，反而內地同香港比較安全。

不過，商務及經濟發展局前副局長梁敬國（Godfrey）就無懼疫情，日前親自陪同囡囡到美國紐約開學。佢話今次旅程相當疲累，因為航班取消咗兩次，直到上個禮拜六先至到達當地，一抵埗就趁住囡囡到宿舍接受隔離之前到處購物。Godfrey希望囡囡嚟緊呢四年除左可以擴闊視野，同同學建立友誼之外，最重要係做一個有良心同正直嘅人。不過，Godfrey返嚟香港就要隔離十四日，佢都有晒心理準備嘞！

梁敬國上個星期六陪同囡囡到紐約開學。	鍾國斌話佢後生嘅時候一支公去英國留學。	鍾國斌

鍾國斌想當年隻身去英國留學

可能見到好多人都陪仔女去外國開學，紡織及製衣界議員鍾國斌（Felix）都湊吓熱鬧，喺社交平台上載一張佢十六歲嘅學生相。Felix話呢排好多朋友帶仔女去英國開學，想當年佢自己一支公飛去當地，要搭成十七個鐘頭長途機先去到。

有網友留言大讚Felix有型靚仔，亦都有網民話以前啲細路返學好少父母陪，通常都係一個人搞掂。咁又係啊，以往嘅年代冇依家咁幸福，後生仔唔會好似依家咁多機會可以去外國留學同發展，真係要好好把握，返到嚟能夠學以致用就最好不過。

卓妮