中環出更：「快問快答」惹誤解 創新辦認衰
本報日前「踢爆」政策創新與統籌辦事處管理嘅「施政報告公眾諮詢」Facebook專頁，推出「快問快答」模式，令網民質疑政府會即刻回答，到頭來只不過係一種拍攝模式。創新辦回覆本報查詢嘅時候「跪低」，話已經即刻修改貼文同埋留言澄清，政府會以影片模式回應網民留言嘅提問。睇嚟創新辦總監馮程淑儀今次真係知衰嘞！
馮程淑儀責無旁貸
創新辦回覆查詢嘅時候係話，「有見快問快答的標題引起小部分網民誤解」，所以就修改貼文，並留言澄清。睇番個貼文，可以見到創新辦喺段落後面加番「局長會拍片，盡量回應大家嘅提問！」唔單止咁，創新辦仲喺貼文下方留言，重複多次同樣嘅說話，指「多謝大家嘅問題，局長會拍片，盡量回應大家嘅提問！」
如果好似創新辦咁講，只係小部分網民誤解，又使乜修改完貼文，再留言澄清呢？定係馮程淑儀都明白，唔少人見到「快問快答」都會覺得政府會盡快回答呢？無論如何，創新辦都話社交網站專頁係佢哋部門負責管理，睇怕今次「甩轆」，就算馮程淑儀點解釋都走唔甩喇！
卓妮