中環出更：血庫不時告急 黃偉傑建同盟籲齊捐血
好多港人都樂善好施，遇上籌款活動都會慷慨解囊，但係一講到捐血，情況就啱啱相反，以致血庫不時告急。天乙慈愛基金會創會會長黃偉傑，都話港人對於捐血並唔積極，所以舊年佢同一班熱心人士成立「捐血同盟」（同盟），以響應持續推動恒常捐血計劃。
點解港人對於捐血會咁冷淡呢？黃偉傑估計港人都認為捐血於生活日程中，並非優先事項。佢又以自己為例，雖一直都覺得捐血救人好有意義，但往往會因其他俗務，將前往捐血站嘅行程一再延後，結果一拖再拖，咁就十幾年喇！黃偉傑相信借助群體力量，可以堅定捐血嘅決心，於是同一班志同道合嘅朋友組成同盟，又邀請企業同機構加入。佢話同盟透過舉辦捐血召集日，又或者安排捐血車抵達會員機構嘅工作場所附近，提醒大家要恒常捐血。黃偉傑又指同盟內有部分義工係病患康復者，特別明白捐血對挽救生命嘅重要性，然而喺疫情之下，好多恒常捐血者都打消原定嘅捐血計劃，不過急需輸血嘅病人，未必可以等得到疫情結束之日。
鍾采霖：有得捐係福氣
社企「絲打便當」創辦人鍾采霖（Vince），就為同盟擔任推廣大使。Vince憶述中學時代，學校舉辦捐血活動，當時只得十六歲嘅佢需要家長簽授權書，先至可以捐出第一滴血。由於有同學被驗出係乙型肝炎帶菌者而不可捐血，於是Vince就覺得自己能夠捐血實在係福氣，並由此養成恒常捐血嘅習慣。Vince又試過分娩之後，容許會方收集「臍帶血」。佢話臍帶血係嬰兒出生後由胎盤收集到嘅血液，由於內含大量原始血球細胞，有助醫治白血病、地中海貧血病等多種頑疾。
唔單止健康狀況，飲食不當都有機會被拒捐血。崇尚素食嘅香港廣西婦女聯會常務理事彭舜玟（Angel）有十年嘅捐血經驗，佢話素食者只要飲食均衡，就唔會影響到血紅素嘅含量。Angel認為任何人，包括家人同朋友都有機會遇到需要輸血嘅情況，因此疫情未止，佢依然都會去捐血。
卓妮