政情：何啟明蒲頭 返「娘家」落區宣傳
勞工及福利局副局長何啟明上任近三個月，但為咗掌握政策範疇，局長羅致光先前話要「收埋」何啟明，以致好少向公眾露面，但尋日佢就返「娘家」，喺藍田同勞工顧問委員會勞方代表鄧家彪一齊呼籲市民參加全民檢測喎。唔知何啟明係去「做騷」，還是太得閒呢？
鄧家彪同行 籲全民檢測
鄧家彪今日喺社交平台上載影片，片中見到佢同何啟明以一問一答嘅模式，向市民宣傳全民檢測嘅重要性。鄧家彪話就算運動員體魄壯健都會「中招」，身體質素及唔上運動員嘅一般市民，為求安心都係參加全民檢測喇。而何啟明就話，好多老人家因染疫而去世，建議大家為咗身邊嘅老人，就算冇症狀都係檢查吓好啲。
事後我哋問番何啟明，點解咁得閒落區呢？佢話鄧家彪約佢落區幫手，咁啱又適逢周日，反正放假得閒冇嘢做，咪幫吓手囉。至於呢排忙緊乜嘢？佢就話局方都係做緊施政報告嘅前期工作，佢都唔算特別忙，所以接下來都會抽時間幫手宣傳吓全民檢測咁話喎。至於何係咪被收埋太耐導致「不甘寂寞」，就留待市民判斷喇。