政情：呻被忽視 抗爭派想入泛民飯盒會
對於民主派議員係咪接受延任，傳統泛民同抗爭派至今仍未有共識。民主黨（白鴿黨）提出以民調決定去留，而抗爭派就有人倡議「影武者」方案，要求留低嘅議員喺未來一年對泛民初選勝出者言聽計從。屬於抗爭派嘅初選出線者劉頴匡，尋日建議擴大「泛民飯盒會」，加入本土派同初選出線者，組成一個更大嘅「Pizza會」，但雙方仍然處於講數階段。
斥黃碧雲梁耀忠唔願溝通
提出「影武者」方案嘅劉頴匡尋日出席一個網台節目時重申，根據早前嘅泛民初選結果，傳統泛民同抗爭派嘅民意支持度各佔一半，形容大家互相都唔可以忽視對方，建議擴大現時由泛民議員組成、用以討論政事同商討議案投票策略嘅民主派會議，加入本土派同初選出線者，組成一個更大嘅「Pizza會」共同參與決策。
劉又話抗爭派同傳統泛民至今見過兩、三次面，但就批評部分傳統泛民，例如專業議政成員、白鴿黨嘅黃碧雲同街工嘅梁耀忠等唔願意同抗爭派會面。同場就有人講笑話，可能有啲人寧願選擇走，都唔想同抗爭派合作咁話喎！