政情：鄭若驊大談法官有過 自己死不認錯
去年反修例示威以來，唔少案件備受爭議，律政司過去曾多次就示威相關案件提出上訴，社會上亦都有聲音批評法庭放生示威者。自上任以嚟醜聞纏身、涉及僭建風波，被批為避政司司長嘅律政司司長鄭若驊尋日又做鍵盤戰士發表網誌，談及法官審理案件時，指「任何人都會犯錯，法官也不例外」。有學者批評鄭咁大條道理話法官有錯，但自己上任以嚟經常失職就死不認錯，失職理應下台。
鄭喺網誌入面表示，法官嘅職責是按法律同證據來審理案件，所以喺得出任何結論之前，都應該以理性同客觀嘅態度，虛心同慎重咁考慮所有相關因素，以及從唔同角度就事件進行分析。鄭又指任何人都會犯錯，法官都不例外，所以喺某些情況下，控辯雙方需要考慮就裁決提出上訴，而當法官喺法律觀點上犯錯、錯誤地運用酌情權，律政司就要決定是否對案件提出上訴，或者喺刑事案件中以呈述方式提出上訴、或申請覆核刑期等。鄭又解釋，律政司嘅所有決定都係根據法律原則同法庭程序，以及經過仔細研究整體案情先作出嘅。
上訴疏忽應告不告 未作檢討
鄭又希望律政司推出嘅「重要判決摘要」，可以畀大眾更了解法律制度嘅運作，又指會同教育局目標一致，透過向學生灌輸《基本法》同法治精神，從而培養佢哋正確嘅價值觀。鄭話律政司未來會繼續推動提升能力建設項目與加強同本地及國際持份者嘅協作，以達成法治公義嘅目標。
理大專業及持續教育學院講師陳偉強批評鄭若驊指出法官有錯，但就唔檢討自己喺上訴方面都有疏忽，成日應告不告。陳指市民大眾會期望公職人員檢討自己，故稱鄭應該盡快為過去失職承認錯誤同落台。
堵塞司法漏洞 寫網誌當做咗
時事評論員陳雲生指出，市民一般相信司法人員係公義嘅，都會理解法官可能會喺技術層面上出錯，但陳雲生指反修例示威以嚟有唔少案件嘅判案都出現原則性錯誤，例如一啲嚴重嘅案件都可以獲得保釋，難免引起市民公憤。陳雲生批評鄭若驊明知司法制度同法官有所不足，但就只喺網誌講句說話，簡直係推卸責任。陳認為鄭應該向公眾說明律政司會點樣處理法官嘅出錯，亦都要同啲法官多啲溝通囉！