中環出更：違泊第一城 李慧琼宣傳車遭鎖
沙田第一城出晒名係鎖車黑點，即使係政界人物都冇情講。尋日民建聯主席李慧琼同黨友嘅宣傳車就喺沙田第一城被鎖，據悉當時司機停車買飯，返到嚟就發現已經鎖緊車，歷時只不過係三分鐘左右。之不過違泊本身就係唔啱，無論你係邊個，做錯事就冇得抵賴！
民建聯成員稱有針對性
呢單違泊事件尋日下午喺Facebook流傳，民建聯成員喺接受查詢時，就解釋話當時司機係停低部車，去快餐店買飯食，點知出嚟就發現鎖緊車，當時已經即刻同鎖車嘅保安員講自己準備離開，「走緊啦！走緊啦！」但保安堅持鎖車，最終要畀番三百二十蚊解鎖，司機仲話附近都有車停泊，不過就冇畀人鎖車，覺得有針對性喎。
該名成員仲話，黨內對宣傳車司機嘅要求寬鬆，交咗路線畀司機後就唔會過問啲時間安排，嚟緊會檢討同提醒司機要注意交通規則，尤其被鎖車嘅第一城路段屬於私家路，就唔可以泊車喇！不過佢都提到，依家禁聚令仍然持續，司機要搵餐廳坐低食飯都唔易，何況當時司機已經係買完外賣之後趕返宣傳車，希望大家都明白司機搵食艱難。話雖如此，不過搵食艱難都唔係違泊藉口喎！