中環出更：邱榮光玩直播 大眾在家參觀蝴蝶館
上個月政府收緊禁聚令，列明最多二人聚集，導致好多活動都無法進行。環保協進會主席邱榮光有份管理嘅蝴蝶館，每逢暑假都有好多學生同團體嚟參觀，不過今年就因疫情肆虐，蝴蝶館無奈要暫時關閉。然而天無絕人之路，佢諗到辦法令到市民唔需要去蝴蝶館，都可以享受相似嘅體驗，就係開直播喇！
邱榮光話開始嘗試影青蛙、蝴蝶、雀仔等動物，雖然拍攝過程最怕啲動物會亂咁郁，但反而令佢掌握到某啲拍攝技巧。至於有冇觀眾呢？佢就話起初都覺得可能缺乏受眾，但唔知係咪市民都有「一顆期待的心」，節目反而好受歡迎喎。至於有時直播會見到動物陷於瀕死狀態，佢就解釋話生命唔係必然，節目亦可提供一定教育意義嘅。
馬家強父女享下廚樂
菁英會副秘書長馬家強，為免酷熱天氣之下戴口罩從事戶外活動，近來暫停同囡囡行山遠足，改為兩父女喺屋企享受下廚樂。雖然囡囡已經懂得製作蛋撻同薄餅，不過佢仍然決定一星期教煮一道菜，目前囡囡已經學過苦瓜炒蛋、麻婆豆腐、螞蟻上樹等家常小菜嘅製作方法。馬家強認為女仔一定要掌握烹飪技巧，當人家品嘗過親手炮製嘅食物而大讚好味，真係自信倍增o架。
保良局前總理黃英鵬（Simy）好熱衷帆船活動，不過礙於疫情，經已有一段時間冇揚帆出海喇。Simy話過往每逢周末或假日，不時可見十數艘帆船徜徉於維港之中，但因顧慮到帆船及岸上更衣室空間有限，為保各船員健康惟有將活動暫停。佢又話要有效避疫無疑係宅在家，然而長期困喺室內都唔係辦法，因此一有機會佢都會同家人坐遊艇出海，駛向人迹罕至嘅沙灘，畀小朋友放吓電之餘，自己又可以舒展吓筋骨。
卓妮