政情：公民講場：疫情緩和僅屬慘勝 袁國勇：下一波爆得更勁

本港近日確診數字有所回落，禁聚令亦略為放寬，香港大學微生物學系講座教授袁國勇尋日就認為第三波疫情，香港付出嘅人命同經濟代價都相當大，形容近日疫情趨向緩和只係「慘勝」一場，又呼籲市民要嚴防隨住秋冬而殺到嘅第四波疫情。睇番兩個月前，當時政府對邊境控制若能夠做到滴水不漏嘅話，呈減退迹象嘅疫情就未必會大反彈。倘若政府嘅抗疫政策再有閃失，港人要回復正常生活，就真係唔知要等到幾時喇。