中環出更：94%受訪者反對泛民議員延任
全國人大常委會決定第六屆立法會繼續履行職責不少於一年，民主派委託香港民意研究所（民研）進行民調，將按結果決定延任與否。民研早前兩次調查已顯示，分別有六成三同最少五成民主派支持者反對延任，尋日再有組織公布另一項調查，有高達九成四受訪者反對延任。
元朗監察議會聯盟喺本月廿二日至廿六日，向約一千一百名市民進行「反對派去留由你話事」調查，壓倒性結果顯示有九成四受訪者認為反對派議員唔應該延任；另有超過九成半市民認為早前被選舉主任取消參選資格嘅四位現任議員唔應該延任；超過九成七受訪者認為因被判刑而喪失下屆參選資格嘅議員邵家臻同陳淑莊，以及公開表明拒絕延任嘅朱凱廸同陳志全同樣唔應該延任。
恐再拉布抗爭 令立會停擺
組織認為結果反映，大多數市民唔接受反對派議員繼續喺議會拉布抗爭，認為會令立法會停擺空轉。涉參與去年元朗7‧21事件被控暴動罪嘅民主黨議員林卓廷，事後話被捕一事證明留喺議會有存在價值，而佢留任嘅決心可謂更加堅定，但被批兩件事毫無關係。至於表明會延任嘅議員鄭松泰就批評其他民主派政黨只會喺社交網站上「爭取」各種訴求，但欠奉上街表達意見，更話建制派為全民病毒檢測計劃發聲係「勤力過民主派」。
卓妮