笑看天下:虐殺及棄養動物醜陋

上天有好生之德?是耶?非耶?所謂「好生之德」,要言之,就係仁愛之心。然而,繼日前海關及警方在大嶼山以南搗破走私案,檢獲十二隻植有晶片嘅狗隻後,赤柱及南丫島亦接連發現藏有貓狗屍體嘅膠籠擱淺,共十五隻貓狗慘死,不排除有人逃避執法人員追捕期間,將裝有寵物嘅膠籠拋落海,釀成慘劇!

事件經本報連日報道及評論,已引起公眾、警方、愛護動物協會關注,老朽自然希望警方全力緝拿冷血兇徒,要知道動物也有生存權、免於恐懼權,虐待動物切不可等閒視之,尤其係文明社會。愛協表示,目前正在照顧上周走私案檢獲嘅十二隻狗,並會盡心盡力照顧這些經歷了重重辛酸嘅毛孩。當然,最妥善處理嘅方法,就係盡快找到其主人,拍照取證後,把十二隻狗狗物歸原主,免佢哋受驚過度,患上分離焦慮症,以致抑鬱病死。

文豪馬克吐溫說過:狗與人不同。一隻喪家犬,你把牠迎到家裏,餵牠,餵得牠生出一層亮晶晶的新毛,牠以後不會咬你。其實狗從不嫌主人家貧,你收養牠,牠必然忠心。老朽退居村野,先後收養三隻流浪唐狗,深深體會馬克吐溫之言!老朽亦深信人狗情深,最近接二連三嘅悲劇,或許是主人北上避疫,疑不惜尋求私梟協助「搭單」走私,主人愛佢變害佢!

依家愛協於臉書專頁呼籲,如有寵物主人最近透過寵物移民公司,將寵物經香港轉運到內地,而目前又與寵物或寵物運輸公司失去聯繫,請立即聯絡愛協督察部或透過電郵,向愛協提供有關寵物嘅晶片號碼和相關資料,以便愛協收集所有資料後,交予有關執法部門協助跟進。此外,愛協亦發現因疫情、移民及經濟困難而棄養嘅動物,於今年四至七月大幅增加,至今已超過一百二十隻。這樣對待家中一分子,如此冷血不負責任,人還配稱「萬物之靈」嗎?不感到醜陋嗎?