政情：林瑞華搞眾籌 鄭錦滿暗諷虛偽
新冠肺炎疫情在港肆虐多時，促使本港失業率屢創新高，當中飲食業更係失業重災區，之但係早前表明有意競逐來屆立法會選舉飲食界議席嘅民主派人士林瑞華（Gordon），近日因不滿警方嘅處事手法，喺社交平台揚言要搞眾籌以刊登報章廣告。另一位非建制派人士鄭錦滿，尋日就出貼指從事飲食業嘅手足好多都冇工開，又要求Gordon幫吓手，暗諷嘅意味甚濃。
鄭喺社交平台嘅貼文指名道姓要搵Gordon，仲話「小弟認識幾位有案在身嘅飲食界從業員，因疫情關係冇工開，需要幫忙生活費，請閣下盡快與小弟聯絡，幫幫佢哋。」鄭隨貼仲附上兩張Gordon公開眾籌登廣告嘅截圖，真係隔住個螢幕，都透出鄭暗指Gordon虛偽嘅濃濃意味。亦有唔少網民留言鬧爆「登廣告有鬼用？有錢直接幫人好過啦。浪費！」
林：唔識呢個人
至於Gordon尋日回覆本報查詢時就話，完全唔識鄭呢個人，又反駁唔知對方點解會咁做，但見佢公開搵自己，都已經私下聯絡咗對方，話了解緊咩事喎。至於網民對佢嘅抨擊，Gordon就話尊重每個人表達意見嘅自由，又指會參考佢哋意見咁話。