政情：長期禁聚拖垮經濟 陳健波倡議疫思維
為緩阻疫情擴散，香港實施禁聚令已經有五個月，但染疫人數仍然不斷上升。議員陳健波（波哥）日前透過網絡視頻，指長期實施禁聚令唔係辦法，因為咁做一定會拖垮經濟，各行各業都受到嚴重影響，失業率飆升，低收入人士打擊最大，真係唔病死都餓死喇。
善用科技檢測追蹤
波哥話香港同其他城市一樣，即使十幾日都好少、甚至乎冇新症，但隨時又會有源頭不明嘅染疫個案，跟着又會爆發新一波疫情。佢話將來即使有新疫苗，亦可能要面對疫情唔會斷尾嘅情況，況且專家都話香港一旦入冬，有機會爆發第四、第五波疫情。而兩輪防疫抗疫基金已經使咗三千幾億，香港嘅萬幾億儲備唔頂得幾耐(口架)！所以政府抗疫真係要有新思維，思考一下如何對經濟影響最少嘅情況下抵抗疫情。
波哥建議政府，嘗試按風險程度嚟放寬禁聚令，譬如容許持健康碼嘅市民進入不設社交限制嘅區域，同埋善用科技，做好檢測同追蹤，若果一人中招就要全區檢驗。至於個人衞生亦不可鬆懈，佢話呢幾個月來，患上一般咳嗽同流行性感冒嘅市民都少咗，可見勤洗手同戴口罩，始終都係第一道防線。