政情：滅蚊各自為政 部門唔踢唔郁

防患牽涉康署路署房署食署

其實彩福邨一直都係蚊患黑點，屋邨又畀公園圍住，更於二○一四年被揭發即使入冬，居民仍然飽受蚊患困擾。當時都有指蚊患來源可能係橫跨屋邨嘅大型斜坡，但係嗰幅斜坡分屬多個部門管理，而喺部門各自為政下，蚊患根本解決無期。

呢個情況似乎幾年嚟都未有改善，Frankie喺貼文忍唔住狠批，康文署滅蚊次數不足，而路政署清理渠道積水、滅蚊等工作唔夠積極，都係踢一踢就做，唔踢就唔做。佢仲話，唔止上述兩個政府部門要做嘢，房屋署同食環署都要幫手先得，一齊做好控蚊工作，避免蚊蟲孳生咁話。

照咁講法，一個屋邨要做好防蚊工作，需要四個政府部門通力合作先可以成事，咁其實蚊患、鼠患問題多年嚟都解決唔到，會唔會就係因為政府部門各自為政嘅作風一直未有改善所致呢？