政情：泛民恨延任扮失憶 內會賣口乖嗌主席

扭擰完又係跪 「總搵到理由留低」

內會早前被民主派拉布導致停擺大半年，直至選出正副主席之後，民主派就話難以承認李慧琼做內會主席，所以杯葛會議，但人唔到，啲示威牌都要到，每次都例牌進行「無聲抗議」。到尋日召開內會特別會議，民主派竟然差啲就齊晒人，包括民主黨胡志偉及公民黨譚文豪，只欠表明唔傾向延任嘅議員陳志全同朱凱廸。民主派「打倒昨日的我」，仲「鬼拍後尾枕」喺發言時稱呼李慧琼做主席添，建制派聽到陰陰嘴笑，唔知係咪民主派要借上內會大鬧官員來證明自己有延任價值呢？

立法會將繼續履行職責不少於一年，但非建制派對於去留仍存在分歧，民主派一早表明話傾向延任，之後又戴頭盔話會按民調結果決定去留。議員陳克勤就忍唔住發文「抽水」，話眼見民主派原本口口聲聲話唔承認內會同內會主席，尋日又照樣現身會議，話民主派總會搵到理由留低，叫佢哋唔好扮晒嘢扭扭擰擰喎。

其實香港民意研究所已經先後做咗兩次有關民主派應否延任立法會嘅民調，早前第一次做已有六成三受訪市民反對民主派延任，到尋日又再公布最新民調，結果顯示有一半民主派支持者及五成八非民主派支持者認為民主派應集體拒絕延任，只有兩成七民主派支持者及兩成非民主派支持者認為佢哋應該延任。

堅持自己委託做民調 龍門任擺

兩次民調數字同事實都放在眼前，但民主派似乎都當睇唔到咁，堅持要按自己嚟緊委託香港民研進行嘅民調作參考，仲要「龍門」任擺，真係非常境界。雖然民主派所做嘅民調未知結果，但最新又多咗教育界議員葉建源表明傾向留任，但就話會徵詢教協同民主派意見再作決定喎。究竟民主派係咪被外界睇死會延任，好快就會有分曉。