中環出更：早倡強積金回水 謝偉俊呻被當透明
因應新冠肺炎疫情，各行各業大受影響，面對市民生活困難，各政黨都提出不同建議，有部分提倡派錢，亦有人建議容許僱員以緊急用途提取部分強積金。過去有份建議強積金回水嘅議員謝偉俊（Paul），尋日喺立法會內務委員會（內會）特別會議上大呻半年前已經提出有關建議，批評政府一直都冇聽佢嘅意見，只偏袒其他建制大黨。
不滿高官偏袒大黨
話說政務司司長張建宗尋日出席內會會議，就防疫措施聽取議員意見。阿Paul批評政府依家係藥石亂投，然後再次進諫，建議政府研究容許市民取回部分強積金，仲話民建聯最近都有支持呢個建議。點知張建宗回應時就直接話多謝民建聯嘅意見，搞到阿Paul隨即火起打岔，話自己已經講咗成大半年，仲強調唔係爭寵，「佢哋（民建聯）梗係永遠最叻(口架)啦！」
唔止強調冇爭寵，阿Paul仲批評張建宗依家先話第一次聽意見，代表一路都冇聽過議員意見，仲直言「難怪（張）話洗碗都係咁好嘅工喇」。畀人兜口兜面咁批評，張即刻拿拿臨話一直都有聽到意見，絕對冇抹殺阿Paul嘅功勞，仲話係有智慧添！照張咁講，唔通打工仔真係有機會提取部分強積金應急？
卓妮