中環出更：滅鼠有方 蕭楚基：全賴五常法
香港長期受鼠患困擾，既妨害衞生又影響商業經營，試想食肆若出現鼠蹤，肯定門堪羅雀。從事餐飲業嘅綠色環保互助委員會主席蕭楚基，自然都好重視鼠患嘅問題。佢話要有效防鼠，除咗要搵蟲鼠專家幫手，亦有賴五常法嘅配合。
所謂五常法，係指常組織、常整頓、常自律、常清潔同常規範。蕭楚基話按呢五項原則，督促員工一定要注意衞生，收舖前務必要清洗各處地方以確保清潔，至於物件必須歸一存放，減少雜物堆積，同埋將物件入盒及盡量離地擺放，既方便清洗地板，亦可令到老鼠無處藏匿。
香港品牌發展局副主席黃偉鴻經營零食代理批發，對於防治鼠患亦有相當經驗。佢話香脆食品往往係老鼠嘅至愛，就算有密封包裝，老鼠都有本事分辨得出繼而咬爛膠袋包裝。佢於是將計就計，利用薯片等零食做餌，引誘老鼠踏入塗上老鼠膠嘅陷阱。黃偉鴻話呢個方法非常成功，縱使依家已不見老鼠蹤影，但仍然長期都有放置老鼠膠，同定期進行清潔消毒。
關佐仲教路 放鼠餌因地制宜
至於防治蟲鼠公司負責人關佐仲，不時為航機同商場進行滅鼠工作，對於防治鼠患甚有心得。佢話講起滅鼠，好多人第一時間就想起老鼠籠，查實老鼠籠只要用過一次，其他老鼠就會聞到上一隻遇害老鼠所遺下嘅氣味，從而引起警惕。佢又指滅鼠方法雖然五花八門，但亦要視乎環境而定，譬如喺豬肉檔附近放置有毒鼠餌，老鼠有得揀擇，又何需理會鼠餌呢？所以唔同嘅環境係要用唔同嘅方法(口架)。不過就算掌握有效嘅滅鼠方法，都要市民保持公共環境衞生，防治鼠患先可以達到事半功倍之效。
卓妮