政情：何君堯倡以忠誠度邀個別議員延任
全國人大常委會早前決定第六屆立法會繼續履行職責不少於一年，而泛民主派議員仲未決定會唔會延任。議員何君堯尋日召開記者會，建議政府應喺十月立法會復會前，根據議員過去有冇忠誠效忠特區政府同擁護《基本法》，而向個別議員發出延任邀請，必須篩走唔合資格嘅議員。
促反修例案訂統一量刑指引
何君堯話違反《基本法》第一○四條《宣誓及聲明條例》、喺早前立法會選舉提名期被取消資格，以及涉嫌參與非法集會等罪行嘅議員都唔應該獲得延任，當中包括被指刻意拖延內務委員會主席選舉、涉嫌公職人員行為不當嘅公民黨郭榮鏗；被選舉主任取消提名資格嘅公民黨議員郭家麒同楊岳橋、會計界議員梁繼昌，以及因一四年違法佔領行動而被判入獄但緩刑兩年嘅公民黨陳淑莊等人。
此外，關於舊年發生嘅反修例示威，何認為終審法院首席法官同律政司須就反修例案件給予統一同清晰嘅量刑指引，堵截司法漏洞。