中環出更：拒檢測惹爭議 何栢良煞停電台節目
新冠肺炎疫情爆發以嚟，周不時都有醫學專家接受訪問，解答公眾疑難，香港大學感染及傳染病中心總監何栢良更幾乎日日現身電台，用十分鐘時間同大家追蹤本港疫情、教授防疫之道，前日佢忽然話呢排工作同家務都比較繁忙，要暫停呢個訪問環節，煞停咗呢個持續大約半年嘅安排，唔通同佢拒絕參加全民檢測有關？
何醫生前日向電台主持人發出短訊之後，就停咗持續半年嘅合作，佢仲喺短訊中話，「多謝電台今年初畀機會我，每日同聽眾分享疫情資訊，自己亦都獲益良多」，又意有所指咁呼籲：「面對疫境，市民大眾要平心靜氣，用『科學』原則去應對，疫境自強！」
遭質疑立場反覆
雖然佢已經解釋咗點解有咁嘅決定，但難免令人聯想到係唔係同佢日前話唔會報名協助全民檢測、亦唔會參加檢測有關？事關呢件事惹嚟唔少爭議，更有人指摘佢之前多番批評政府檢測工作做得唔夠，檢測量太少，唔能夠有效防疫，但到政府推行大規模檢測時，佢又批評作用唔大，質疑佢立場反覆，甚至有網民質疑佢得閒做節目，但就唔得閒抽好少時間做檢測添！之但係，佢煞停咗電台節目嘅訪問，係咪可以平息呢場風波呢？