政情：有相為證：交還浸大辦公室 邵家臻啲書多到入倉
因違法佔領而被判囚八個月嘅社福界議員邵家臻，上月底正式收到浸會大學通知，新學年不獲續約，現有合約將會喺呢個月尾結束，佢話下個星期一（31日）就要交回辦公室鎖匙同職員證，到時會返學校辦理相關手續。
邵家臻喺浸會大學擔任教職十多年，咁長嘅歲月當然累積唔少書籍喺辦公室裏面，依家要離開就要想辦法搵地方安置大量嘅書籍。邵家臻話搵咗搬屋公司幫手，用咗十三個紙箱入起啲書，然後儲放喺迷你倉裏面，至於不時要拎上手重溫嘅書籍，就攞咗返立法會。佢又話早前搞咗個活動，將部分書籍送畀浸大同本地大學社工系嘅學生，希望自己就算唔再教書，都可以同年輕人分享餘溫。