中環出更：泛民鬼打鬼 抗爭派斥議員欠抗爭意志
立法會因押後選舉而出現真空期，全國人大常委會決定現屆議員延任唔少於一年，但非建制派內部對於去或留至今仍未有共識。早前喺泛民初選中出線、主張拒絕延任嘅荃灣區議員岑敖暉尋日出席一個論壇時，質疑部分泛民議員過去欠缺抗爭意志。
楊岳橋死撐各有分工
同場嘅公民黨（公文袋）現任議員楊岳橋則反駁，強調泛民在議會內有不同分工，唔同意有部分議員被批評為表現不堪。
對於民主黨（白鴿黨）同公文袋等話會跟從民調作決定，岑認為現屆議員喺九月三十日後將失去四年前從選舉所獲嘅民意授權，形容民調係沒有辦法中嘅辦法，但質疑喺依家用雙門檻作決定，會出現三分二民主派支持者認同要走，但最終決定同港人意願違背嘅情況；又話民主派議員必須承認，過往有部分議員嘅抗爭意志不強，難以支持佢哋繼續議會陣線。
楊則重提《逃犯條例》修訂同內務委員會嘅選主席風波，擔心若議會中失去民主派嘅聲音，所有議案只會光速通過，受影響嘅只會係港人。
卓妮