中環出更：外賣垃圾積如山 黃家和促補貼用環保物料
環保同抗疫，似乎難以並存。除咗每日都要更換嘅口罩，因外賣而來嘅一次性器皿同餐具亦增加堆填區嘅負荷。香港餐飲聯業協會會長黃家和，就指餐飲業堂食面對時間同人數嘅限制，驅使好多客人都選擇叫外賣，然而此舉必定會造成大量器皿同餐具廢物，就算業界有意多啲採用環保物料，但礙於成本高昂，政府又冇任何補貼，業界都有心無力。
黃家和日前同中華廠商聯合會副會長吳清煥出席一個記者會。黃家和承認，餐飲業界雖向來都未能滿足環保嘅嚴格要求，好似膠質物料嘅採用同廢物棄置等，不過一直都有同政府溝通。佢慨嘆，近期外賣數量大增，堆填區就嚟負荷唔住，儘管好多食肆都有意使用環保物料，但面對高兩、三倍嘅成本實在令到人望而卻步，加上近期生意受疫情打擊，好多食肆都迹近山窮水盡，又點有餘力落實環保？佢又提到，如果政府想推動環保，就必須給予適切援助。
盧金榮：研發可自然分解口罩
香港品牌發展局副主席盧金榮就話，自己從事製造業，而工業上所用嘅物料都係符合環保要求，務求減少對環境嘅傷害，佢仲透露，因為疫情關係，口罩使用量同樣大幅上升，所以廠商會正研究可以自然分解嘅環保口罩。另外，盧指自己喺日常生活亦都以身作則，每逢叫外賣都盡可能自己帶備飯盒同私人餐具，務求盡量減少對環境嘅損害。
至於經營醬油製造，一九年「品牌選舉」得獎企業代表龐中衡就話，醬油生產過程自古以來都非常環保，譬如黃豆呢種原材料，曬完豉油之後就會交畀豬農用作飼料；另外，到依家為止佢哋經營嘅醬油店舖，都保持一貫以來嘅零售傳統，就係顧客可以自備器皿到店舖盛載醬油，亦得到唔少市民配合，特別係一啲上咗年紀嘅顧客咁話。
卓妮