政情：大學生憂前路 張建宗話洗碗都係經驗
本港失業率創十五年新高，唔少應屆大學生都好擔心畢業變失業。政務司司長張建宗前日出席青年發展委員會網上會議時，呼籲年輕人搵工時唔好太揀擇，仲話就算做洗碗亦都係工作經驗，叫青年人要做好期望管理。但呢番說話就令網民十分不滿，話張簡直係「堅離地」，仲話現時全部餐廳都唔開得等執笠，仲邊有碗洗吖？
張建宗就話，其實僱主最着重嘅係態度，叫青年人最重要係「不要太揀擇」，識得放低身段，做好期望管理，仲話就算做洗碗亦都係工作經驗，而履歷上有捱得嘅工作經驗嘅話，仲可能會打動到僱主，令佢覺得你好有上進心。
張秀賢社交網貼文諷刺
之不過，唔少網民聽完都話佢「堅離地」，反問佢會唔會叫自己個孫做洗碗？有人更加講笑話，若果做完洗碗去考政務官，經驗同膽量一定可以震驚面試官！元朗區議員張秀賢更喺社交網站出貼文諷刺張建宗，話依家堂食生意少咗咁多，分分鐘連洗碗工都未必可以搵到，仲話不如叫年輕人幫張建宗洗頭、剪髮，話唔止工作經驗可以開眼界，更加係考眼界添！