志邦：「偉明，你隻手指冇事嘛，包到成隻糉咁嘅？」
偉明：「唔好提啦！尋日做嘢時候唔小心整親。我搵咗好耐先至搵到個急救箱，打開之後仲要發現消毒紗布過咗期，消毒棉花又得番細半包。我又唔知可以搵邊個幫手！」
志邦：「咁真係好有問題喎！急救箱應該放在當眼地方，箱外面仲必須清楚寫上『FIRST AID』及『急救』的字樣，咁樣要用嘅時候先至可以即刻搵到。而且根據《職業安全及健康規例》，工作場所嘅急救箱上面應該寫上最少兩個負責管理急救箱物品嘅同事個名，而且響工作時間內有最少一名負責同事當值。睇嚟公司冇安排同事去負責呢樣嘢，又或者負責同事冇定期檢查箱內急救物品，先至會咁！」
偉明：「原來有咁嘅要求？咁規例有冇講明急救箱入面應該放乜嘢急救用品？」
志邦：「勞工處出版嘅《急救指南》列明急救箱內應有嘅用品種類及數量，仲提供受傷時之急救處理方法的一般指引。另一本《急救簡介》就有介紹唔同工作場所例如工廠、貨櫃處理作業、建築地盤同埋石礦場等的急救設施和人員的需要。一般其他工作場所嘅負責人必須為每一百名或不足一百名僱員設置一個急救箱。舉個例子，我們呢個寫字樓有大約一百六十人，所以呢度最少要有兩個急救箱。」
偉明：「咁急救由邊個負責呀？」
志邦：「梗係合資格急救員啦，根據規例要求，工作場所入面每一百五十名僱員就要有一個合資格急救員。所以我哋呢個寫字樓應該最少要有一個急救員，如果唔係就觸犯咗法例啦。」
偉明：「咁我哋快啲去提醒老闆，做番好呢啲要求啦！」
職業安全健康局
www.oshc.org.hk