本港社會經濟喺呢大半年因為新冠肺炎疫情而重創，雖然政府嘅防疫抗疫基金已經再度加碼，不過救市嘅效果就好有限。雖則政府日前宣布推出第三輪基金，獲得唔少黨派嘅支持，但係民主黨尋日去信政府，批評政府派錢措施有疏漏，仲要求再次全民派一萬蚊添。派錢就固然人人開心，之不過政府過往被批評係「守財奴」，甚至派錢程序都歎慢板。眼見政府喺防疫方面備受批評，唔知財政司司長陳茂波今次又會唔會順應民意派吓錢，挽救吓民望？
