政情：出面打風 張仁良家中出席開幕禮
以往一旦掛起八號風球，幾乎所有活動都需要取消或改期，但過去大半年唔少人都習慣咗用視像通話，「風雨不改」唔再只係一句口號。賽馬會運算思維教育國際會議網上開幕禮就喺尋日照常舉行，有參加者笑言「真係打風都打唔甩」。
電子會議可免天氣影響
而香港教育大學校長張仁良，指疫情令學校無法面授教學，無論係大、中、小學定幼稚園，都對網上教學有一定需求，佢仲乘機向與會者介紹教大喺呢方面有咩搞作添！
另一位主持開幕禮嘅嘉賓，馬會慈善及社區事務執行總監張亮喺發言時，亦認為電子會議可免受天氣影響，風雨無阻，而且即使大家身處喺其他國家，亦唔需要專登花時間搭飛機。之後佢向與會者介紹，話呢個教育計劃自二○一六年推出以嚟，已經搵嚟三十二間小學參加，幫助超過兩萬名高小學生，提升佢哋嘅基礎程式編寫同解難能力，仲話會喺未來四年將計劃推展至二百間小學。