政情：深宵未眠 岑智明做追風中年
颱風「海高斯」吹襲香港，天文台前晚一度先後發出八號及九號烈風或暴風信號，成為今年首個吹襲香港嘅颱風。天文台前台長岑智明尋日凌晨喺社交媒體發文，岑智明雖然退下火線，但仍深宵未眠關注海高斯動向，與一眾「風迷」一齊追風。
貼文揣測有冇十號波
岑喺貼文中表示，「估唔到阿鄭（鄭楚明）坐正台長後掛嘅第一個八號風球就有驚喜！」佢所講嘅驚喜，應該係指海高斯威力好大。岑續稱，黃茅洲錄得颶風風力，又一度提及八年前襲港嘅強颱風韋森特，並揣測：「究竟有冇十號波呢？」
不過，最終退休台長都係貼地嘅，佢就希望風暴潮不太嚴重，否則大澳甚至澳門將陷入危險境地。佢又話，幸好風暴潮最高時間同天文大潮時間有出入，因此本港水浸情況應該冇預期咁嚴重。