中環出更：縱容前檢控官出「黑暴秘笈」 鄭若驊把關不力 議員促究責
人稱「避政司司長」嘅律政司司長鄭若驊民望長期「墊司底」，唔止其身不正，仲被多番批評冇能力管理下屬，被要求問責下台。律政司前檢控官翁達揚早前出版法律常識書籍，因為涉教導疑犯避開法律陷阱，被外界質疑係「黑暴秘笈」，雖然翁已經離職，但有議員擔心涉嫌違反檢控守則同埋構成利益衝突，要求律政司重新審視。
周浩鼎直斥，鄭若驊作為律政司「阿頭」責無旁貸，應嚴肅跟進事件，同埋向公眾清晰交代整件事嘅來龍去脈，現階段佢就等緊律政司嘅回覆。佢仲話，若果律政司唔回覆、或者答覆唔清晰，就會留待立法會恢復大會後，以質詢方式同埋喺司法及法律事務委員會上提出相關議程，要求鄭若驊解釋。
離職定解僱欠交代
唔單止咁，周話翁達揚出版「黑暴秘笈」係得到律政司批准，大鬧成件事好離譜，仲話鄭若驊作為把關者，竟然批准翁出版，質疑究竟係鄭冇把關、定係成件事有其他內情，認為若果係機制問題，佢就建議徹底改善制度喇。
佢仲話，雖然依家翁達揚已經離職，但律政司至今亦冇交代係翁自己離職定係被解僱，所以無論如何，鄭都需要畀議員同公眾一個交代喇！
卓妮