中環出更：疫下新諗頭 謝海發：餐廳數碼化時機到
新冠肺炎疫情已持續超過半年，影響香港各行各業，經濟大受打擊。不過正所謂有危就有機，點樣係逆境入面搵機遇先係生存之道。從事飲食業嘅香港青年創業家總商會主席謝海發同其他同業一樣，遭受疫情衝擊生意大不如前，但佢認為現時反而係機會推動餐廳數碼化，只要動動腦筋，疫情下都可以有好多突破。
謝海發指疫情下，好多人都唔想接觸現金同埋公用設施，就連食客都會避免觸摸餐牌，所以佢哋推出電子點餐。雖然一開始推動科技轉型，餐廳同事係有啲抗拒，但謝就解釋畀同事聽，電子點餐可以避免客人因為落錯單而責備店員。謝又指餐廳目前多咗隔開餐枱嘅間隔板，雖然驟眼睇落有啲似工地，不過食客就覺得提升安全之餘，私隱度又高咗，而部分供應商亦推出可以印上商標嘅間隔板。其實只要諗諗新意思，疫情下嘅生意仍有可為。
梁凱喬自學整相及排版
疫情除咗推動業務數碼化，仲可以令員工同老闆都學多啲嘢。香港青年創業家總商會副主席梁凱喬表示，因應疫情期間工作量增加，於是自學相片後期製作以及設計排版，明白到自己都需要升級轉型，亦深切體會到員工平時所面對嘅工作盲點。儘管目前唔少企業實施員工居家工作，但亦都有啲公司因為工種嘅關係，員工需要返去辦公室當值，梁就畀員工自行選擇返公司還是留喺屋企工作，佢話給予員工選擇權之後，反而更願意到辦公室開工或者留低開OT添！
近年人工智能同大數據都係熱門科技話題，原來兩者都可以喺防疫工作上幫到手。科創學院創辦人蔡智文指，人工智能可以幫市民進入餐廳同商場前量度體溫，又可以協助健康碼嘅應用。蔡又話，市民近半年難以出門遠行，但如果想喺外國購買物業可以點算？蔡指依家市民仲可以透過VR（虛擬實境）睇樓添。咁就可以足不出戶都做到想做嘅嘢啦！
卓妮