今屆文憑試經歷咗唔少波折，首先係因疫情而延期，其後又鬧出被稱為「賣國試題」嘅歷史科必答題風波，最終試題遭取消，而該科嘅委員會秘書楊穎宇傳因涉及不當言論近日辭職。點知香港考試及評核局尋日公布，秘書長蘇國生將喺明年三月完成任期後離職。據了解，蘇主動向委員會提出唔續約。

考評局尋日發出新聞稿，公布蘇國生明年離任嘅消息，亦隨之展開招聘秘書長一職，以填補蘇完成任期後嘅空缺。考評局已成立由主席容永祺領導嘅招聘委員會，統籌有關招聘工作，並將委任人事顧問協助喺本港同外地物色合適人選，供考評局委員會考慮。容話今次招聘公開進行，考評局內部人選同外間應徵者，只要符合資格均可獲考慮。

蘇國生喺一七年加入考評局，而加入考評局之前，佢係浸會大學教務長。佢尋日冇喺考評局新聞稿中透露去向，只提到投身香港教育服務三十年，認為現在係合適嘅時候發展個人志向，並喺其他範疇服務社會咁話。

容永祺讚揚蘇對考評局發展貢獻良多，又提到文憑試喺蘇嘅領導下，於疫情嚴峻期間仍得以順利舉行，並落實各項防疫安排，以保障考生、考務人員同市民嘅健康同安全。容話考評局更加係率先成功喺全球疫情下舉行大型公開考試嘅考試機構之一。

話時話，「賣國試題」惹起軒然大波，試題最終被取消，而身兼考評局評核發展部經理及文憑試歷史科委員會秘書楊穎宇，因曾喺網上發表不滿言論，有傳近日已向考評局請辭。另外，被指疑曾喺社交網站留言「林鄭滾蛋！」嘅考評局評核發展部高級經理（通識）盧家耀，亦與同負責該科嘅評核經理梁紫艷雙雙辭職。

另外，考評局歷史科委員會任期將喺本月三十一日屆滿，其中主席劉智鵬已完成三屆共六年任期，按規定唔能夠繼續連任。

而喺呢場風波當中，蘇國生備受各方壓力，而依家表面睇嚟，風波似係平息，但局內人事變動又彷彿仍有暗湧，佢突然話唔再續任，難免令人聯想到同呢場風波有關。究竟佢要發展乜嘢個人志向，令佢咁大決心離開？大家拭目以待嘞！