香港特首林鄭月娥上周六通知行政會議秘書處，刪除佢喺行會個人利益登記冊上，有關英國劍橋大學沃爾森學院名譽院士身份嘅項目。而沃爾森學院喺同日發出聲明，話自香港喺最近發生嘅事情（修例風波同埋實施《港區國安法》）後，學院關注林鄭對保障香港人權同埋言論自由嘅承諾，但林鄭以辭任名譽院士作為回應。
聲明表示，沃爾森學院原定喺下月初檢視林鄭喺學院嘅名譽院士名銜，但依家已經不再考慮，未來亦唔會再作任何評論。其實香港實施《港區國安法》後，沃爾森學院院長克拉克教授（Professor Jane Clarke）上月初曾發聲明話，考慮褫奪林鄭嘅名譽院士名銜。
而林鄭前晚喺社交平台專頁內表示，今次係佢主動放棄有關名銜，仲話學院對佢嘅指控屬「莫須有」，而佢為咗維護特區政府同特首尊嚴，曾再次去信反駁，並指出對於學院以毫無事實根據、道聽塗說嘅態度去誣衊別人感到十分失望。而林鄭話難以說服自己繼續同沃爾森學院有任何聯繫，所以一併將名譽院士名銜退回。