政情：朱凱廸表態 撐杯葛延任立會
全國人大常委會早前宣布第六屆立法會將延任不少於一年，近日焦點就落喺民主派現任議員會唔會留任，有非建制派就表明留任，亦有抗爭派提倡總辭，認為應以未來一年立法會嘅「正當性」為先。繼熱血公民議員鄭松泰表態後，屬抗爭派之一嘅議員朱凱廸尋晚亦公開表達意向，不過就話支持集體杯葛延任立法會，仲話民主派應以公投或民調做決定，佢亦係民主派首個議員表態。
話說朱凱廸近日喺街頭做民意調查，尋日話支持集體杯葛嘅原因包括《基本法》規定立法會任期為四年，任期完結後繼續自認係港人代表係違反代議民主嘅原則；又話集體杯葛延任可向國際社會表明香港問題未解決。
話應搞公投定去留
佢話大部分喺街站留言嘅市民認為議員去留需要經過公民投票，又或者係民意調查決定，佢亦都話支持，認為延任一年只會淪為同零票當選嘅功能組別議員一樣。
民主派點做都未知，但前議員區諾軒認為未來一年嘅議會肯定冇民意授權，民主派應該要話畀大眾知嚟緊一年想點。對於有指民主派留任只係為錢，佢就覺得反感，仲形容係勝利球迷，做到就話好嘢，做唔到就話為錢。