政情：反中亂港官司纏身 黎智英自認撩是鬥非得罪人多
警方國家安全處早前以涉嫌觸犯《港區國安法》中「勾結外國或者境外勢力危害國家安全罪」及串謀詐騙等，大舉拘捕壹傳媒黎智英等十人，其後獲准保釋候查。黎智英尋日出席網台節目時，自認一生人都係個非常受爭議嘅人，撩是鬥非，從事邊一行都係唔守規矩嘅人，經常為咗出位而得罪好多人。
官司纏身嘅黎智英，近日又被人翻舊帳。話說有人瘋傳佢多年前出席某電視台深夜清談節目時，曾經講過自己因為做佐丹奴做到悶，所以先開《蘋果日報》嚟玩吓。佢尋日喺網台節目一開頭就話，若果話佢做衫做到悶，呢件事係啱，但就形容自己做傳媒嘅心態唔係玩。之但係，佢之後又覺得話佢係玩又唔完全係錯，仲話自己做咗咁多撩是鬥非嘅嘢，冇諗過做完就走。
死撐唔驚送返內地
黎又揚言，自己呢世人冇乜嘢驚，即使今次被捕後可能會被送到中國內地，自己亦都冇恐懼，覺得上就上喇；又聲言唔怕去搏，唔會去諗人生有盡頭，做事亦唔會去到諗會有壞嘅後果。佢又憶起自己被捕時嘅情景，話雖然自己今次被鎖上手銬，但就冇感到被侮辱嘅感覺，仲形容呢個可能係佢必須要付出嘅代價，又話無論係乜代價都會接受。
對兩子被捕無歉意
被問到若果將來真係被送返內地，有乜嘢係放唔低時，佢就話自己冇嘢係放唔低，到時亦唔會諗呢樣嘢，會接受命運；仲形容自己係「行步見步」嘅人。對於自己兩個仔早前同樣被捕，黎就形容自己覺得好震驚，但就唔覺得對唔住佢哋。
唔單止早前因涉嫌違反港區國安法被捕，查實黎智英一直官司纏身，例如喺舊年就涉及三宗未經批准集結案，被控兩項組織未經批准集結罪同三項參與未經批准集結罪，而喺保釋候訊期間，黎喺今年嘅六月四日就喺銅鑼灣維園「快閃十五分鐘」出席燭光晚會悼念六四事件，其後再被控涉嫌煽惑他人參與未經批准嘅集結。