中環出更：點評時尚專業女性 歐陽鳳盈：要識執生
城市女青年商會舉辦嘅 「第十屆全港時尚專業女性選舉」，受疫情影響頒獎晚宴搞唔成而改成預先錄影方式作網上播出。咁何謂時尚專業呢？香港菁英會副主席李煥明同委員歐陽鳳盈（Michelle）就話好似搞今次活動咁，識得靈活變通係作為時尚專業女性嘅條件之一嚟(口架)。
Michelle係上屆得獎者之一，佢話要成為時尚專業女性，識「執生」好重要，以佢從事公關公司為例，搞活動好多時有變數，試過客人因事突然要求提早，原本要三星期籌備嘅活動佢哋要一個星期交貨，如疫情期間令活動要不斷延期，佢就先做好設計工作，(目及)實場地檔期，等疫情放緩就可以即時安排活動啦。佢話只要做定兩手準備，就唔會打亂陣腳。
今屆其中一位得獎者楊嘉美（May）就係識得靈活變通嘞！從事環保雕塑嘅May分享時話，疫情影響冇得舉辦大型展覽，佢就改變策略落社區，同餐廳合作回收食完嘅貝殼，清潔後同小朋友一齊髹上不同顏料變成藝術品再展出，反而多咗機會畀佢同小朋友分享藝術同推廣環保。阿May話只要對自己嘅事業有熱誠，就算遇到難題都會有動力去解決。佢希望將藝術帶入社區，走出博物館同藝術館從而普及化。
王嘉恩讚女士較細心冷靜
另一位得獎者徐兆兒（April）就認為要做時尚專業女性一定要事事親力親為。身兼兩子之母嘅April從事教育，嚟緊會喺香港辦幼稚園，雖然身為校監，但無論裝修同搞牌照，April都落手落腳去跟，親身去唔同嘅政府部門辦理各種文件，佢話咁先可以理解流程同埋前線同事工作上嘅難處。佢話做職業女性要兼顧事業同家庭，最重要係另一半同家人嘅支持。
出席嘉賓王嘉恩話以佢哋物流業為例，因較體力化所以通常都以男士為主，感覺比較剛強，但近年公司都請多咗女士，主要負責管理同策劃工作，佢話女士做事通常較細心同冷靜，正好填補行業結構性上嘅需要，佢仲好佩服啲同事做好工作之餘仲可以兼顧家庭，真係要畀個服字佢哋咁話。
卓妮