政情：政治騷太多 柯創盛憂區會淪鬥獸場
今屆區議會變天，民主派主導咗其中十七個區議會。擔任咗觀塘區議員超過廿年嘅柯創盛（柯仔）尋日出席網台節目時話，覺得依家嘅區議會注重政治表態同做騷，擔心未來可能會淪為政治角力嘅鬥獸場，希望大家可以「求大同、存小異」，理性、務實咁做好地區工作咁話喎。
阻礙民生議題 促適可而止
柯仔認為，區議會係一個比較基層嘅諮詢組織，討論同市民息息相關嘅地區議題，例如區內嘅交通、環境衞生同社福設施等等，所以擔心若開會時用太多精力討論政治問題，變相會解決唔到呢啲居民最貼身嘅問題。佢又以油尖旺區議會為例，指該區區議員喺改朝換代後，決定拆走多年前因應高空擲物而裝設的閉路電視。
過去大半年，泛民曾多次喺區議會上提出討論政治議題，被民政專員指不符合《區議會條例》嘅規定，隨後民政專員拉隊離場嘅畫面屢見不鮮。柯仔就話，觀塘區比其他區嘅情況好，較少出現呢啲情況，但提醒一眾區議員要適可宜止，因為冇市民希望見到政治凌駕民生。近年社會氣氛唔太和諧，睇嚟講就容易，做起上嚟就有難度喇！