政情：沈祖堯將赴星洲任醫學院院長
喺沙士抗疫期間被譽為亞洲英雄嘅中文大學前校長沈祖堯，將於明年三月到新加坡南洋理工大學接任醫學院院長同高級副校長一職，將領導生命科學領域嘅研究。佢又向香港醫療團隊致意，強調唔係倒戈相向，冀日後能善用喺新加坡同香港嘅工作經驗，推動兩地喺教育同科研上有更多合作。
強調非倒戈 暫別唔係告別
現為中大內科及藥物治療學系醫學講座教授沈祖堯尋日喺Facebook貼文，以「暫別；下一站新加坡」為題宣布自己即將離開中大嘅消息，佢強調只係暫別而唔係告別。對於要與中大嘅醫療服務同研究團隊分隔兩地，以及離開香港感不捨，強調香港永遠係佢深愛嘅家。
對於加入南洋理工大學感到興奮，佢形容係難得嘅機遇，讓佢參與一所年輕、充滿活力嘅醫學院嘅發展，並領導一所著名大學喺生命科學領域嘅研究，特別係人工智能同未來醫學嘅結合。
根據國際高等教育資訊機構Quacquarelli Symonds（QS）公布最新世界大學排名，新加坡南洋理工大學位列十三，在亞洲排名第二。