疫情衝擊消費巿道，有營商者嘅生意陷入防守狀態，亦有人覺得呢個先係擴充業務嘅好時機。香港傳承基金尋日搞咗個捐贈儀式，響應今次捐贈嘅食品集團董事長嚴運波（Martin），大呻疫巿之下自己都係艱苦經營，不過做生意一味死守都唔係辦法，要逆水行舟先有出路，所以疫情初期佢做咗個大膽嘅決定，就係逆市下擴充業務嘞。

Martin回想創業嘅初心，係希望老師傅嘅手藝得以傳承落去。所以佢並冇為退休年齡劃界，好多年過七十嘅老師傅仲幫緊佢手，若果盤生意守唔住班師傅就要真係要解甲歸田啦。佢話經營食品業最緊要係對自己嘅出品有信心，加上朋友亦予以正面評價，覺得反正無了期咁死守，不如趁租金下調博一博，開多幾間分店等多啲人試下老師傅嘅出品，博取大家欣賞同支持咁話。而佢今次就捐贈一批專為長者研發嘅低糖月餅，希望老友記喺疫情陰霾之下都可以歡度中秋。

基金創辦人賴國偉以及總理團主席趙芝勝，都話疫情搞到佢哋好頭痛，本來計劃好嘅慈善活動都因禁聚令收緊，一再改期，惟有動吓腦筋轉吓個玩法，就好似啱啱舉行嘅慈善行山，由集體行動改為個別形式，參與嘅善長只需將自己行山時影低嘅靚景上載去基金嘅網站就得喇。趙芝勝話理解目前嘅限制措施係無可避免，總之就盡做，希望多多益善少少無拘啦。

有「中國金槌拍賣官」之稱嘅傳承基金總理金鈴，就話疫情對佢嘅生活影響都好大，事關疫情好多地方唔去得，於是就試吓跟朋友去行山，點知一試就上癮，以致幾個月來都慣於每星期行兩、三日山，話覺得身體健康咗又可以睇吓啲靚風景，仲定咗個目標畀自己，話一生人點都要參加一次毅行者添。

卓妮