政府不時透過宣傳，呼籲勞資雙方都要注意職業安全，不過醫院管理局就好似唔係點聽政府支笛喇。話說醫院非緊急運送服務嘅員工，經常喺欠缺足夠防護裝備之下往返高風險場所，有工會代表話沙士襲港時期，就算運送病毒檢測呈陰性嘅病人，員工都會獲發包括N95口罩在內嘅全副裝備，依家新冠肺炎疫情嘅嚴重性同沙士不相上下，防疫標準反而不及舊時。其實前線醫護都唔係第一次反映問題，范鴻齡作為醫管局主席，係咪應該要正視問題呢？若果有員工因防護不足而染疫，咁就弊家伙喇！
