政情：戴耀廷不忿被炒 葉劉認同港大決定
早前香港大學校務委員會投票以十八票對二票，通過即時解僱違法佔領行動（佔中）發起人之一、港大法律系副教授戴耀廷。之後戴耀廷不服裁決，仲公開話要提出上訴，直斥校委會決定係傷害香港學術自由，同時仲有學生同教師抗議反對決定，促請校委會撤回添。議員葉劉淑儀（葉劉）日前就拍片，直斥戴耀廷等人反對決定，先係違反學術自由及院校自主。
葉劉尋日指，其實根據《基本法》，以及○七年就時任教育統籌局官員被指干預學術自由嘅法庭裁決，香港對何謂學術自由有清楚嘅定義，院校有自主同埋學術自由，當中包括聘請同解僱自由，有權請嘅時候亦同樣有權炒人，所以港大決定絕對合情、合理、同埋合法。
批要求學生自主是荒謬
至於戴耀廷指大學以外勢力推翻校內決定係昭然若揭，葉劉就話環顧每間高等院校，甚至全球各大專院校，最高管治機構都係有「外人」參與，由社會上不同傑出人士擔任，大學先可全面發展。葉劉仲批評，要求學生自主係荒謬，因為學生仍處於求學階段，起碼要畢業後成為有經驗、成熟嘅人先知道大學要行咩路，請咩人應該由招聘委員會去做。