政情：陳健波批反對派蠶蟲師爺太多
近年社會氣氛差，有議員就矛頭直指反對派扭曲事實、製造仇恨。而保險界議員陳健波（波哥）尋日就拍片，批評反對派有太多蠶蟲師爺，最叻係企喺道德高地。
斥搞到香港雞毛鴨血
波哥尋日喺Facebook上載片段，鬧爆啲反對派搞到香港雞毛鴨血，稱反對派有唔少住喺大學嘅所謂學者，長時間都生活喺象牙塔內，一畢業就出嚟教書，冇捱過世界，形容佢哋薪高糧準，活喺理論世界，直斥呢班學者根本係堅離地。
唔止形容啲學者堅離地，波哥仲提到唔少反對派嘅行動，包括一四年違法佔領行動、有本土派喺莊嚴立法會上羞辱中國，搞到人大釋法同埋取消資格等。佢狠批呢類學者對政府充滿敵意，拎住鐵飯碗喺網上發表，大量表面上站喺道德高地嘅言論，成功分化港人，同時又鼓勵年輕人參與政治，令班年輕人成為爛頭蟀。佢慨嘆，只要有更多港人回歸理性，香港先有希望，希望呢班學者可以重回正軌咁話。