政情：不滿全民檢測拖拉 梁美芬點名批陳肇始
內地核酸檢測支援隊日前來港，協助加強香港病毒檢測能力，而政府喺尋日就宣布話將會進行全民病毒檢測，議員梁美芬（Priscilla）早前現身網上直播，期間談及有市民抗拒內地支援隊幫助推展全民檢測，仲點名批評食物及衞生局局長陳肇始拖拖拉拉，唔敢得罪某啲喺醫護界有影響力人士，希望大家真係可以接受內地支援隊嘅幫助，盡快落實全民檢測。
Priscilla話，內地十四億人口嘅抗疫方法，本港七百萬人為何不願吸納吓人哋經驗，唔少內地大城市都係由全民檢測追蹤到隱形播毒者。佢認為現時疫情好嚴峻，唔少打工仔冇工開，好多中小企亦就快捱唔住，依家經濟轉差，政府喺醫療方面拖拉須負上責任，不過遲做總好過冇做，政府現時要大刀闊斧，千萬唔好畀醫護界某部分人拖住後腿。
指內地支援隊非搶飯碗
Priscilla又提到，內地支援隊並非搶飯碗，處理好疫情之後佢哋就會返去，反問用全國之力控制疫情，唔係好事咩？當控制好疫情，再開通健康碼，就可以恢復香港同內地嘅往來。