政情：政府大落後 地盤工好愁
本港第三波疫情持續嚴峻，最近更蔓延至地盤，搞到唔少建造業界人士人心惶惶。建築、測量、都市規劃及園境界議員謝偉銓（Tony）日前就出席咗由香港營造師學會舉辦嘅視像講座，就建造業生態與政治環境嘅關係，與業界人士分享交流，Tony提到政府唔了解佢哋嘅困難同訴求，仲非常落後，完全唔識善用創新科技。
Tony話，建造業界面對嘅最大問題，係工程量時多時少，企業難以有效規劃人力資源及業務發展，專業人士面對收入不均及職位不穩，基層工人就更係手停口停，佢特別講到現時行業老化問題，甚少新人加入，加上創新技術投入不足，搞到近二十年建造業發展都相當緩慢，並引發「割喉式落標」，佢解釋咁只係頂住檔，養住命，事後就容易出現工程延誤、超支及質量問題，佢解釋，雖然依家勞力冇咁貴，但疫情緣故，大多材料嚟得慢，變相就貴咗。
議員鬧爆攬炒派拉布
Tony仲鬧爆攬炒派嘅拉布行為，搞到政府每年平均推出約一千二百億元工務工程及顧問項目被打亂晒。加上最近疫情社區大爆發，可以話邊行邊業都有人中招，地盤都唔例外，好多工程都冇得做，業界人士真係不知如何是好。
冀政府推出已批工程
而疫情發展到今時今日，政府似乎冇咩實質措施幫助，好似工程材料開支嘅「入單」，即向政府申請要求發還，都拖得就拖，批核過程龜速，Tony話如果將兩個月批核時間縮至兩周會好好多，早啲拎錢避免資金流出現壓力。另外，過去已經批咗嘅工程，希望政府都可以盡快推出，而留意到好多政府人員都實行居家工作，政府應有配套措施，喺可行情況下盡快落標。
Tony仲話，除中招地盤工程要暫時停止外，其他無事嘅地盤都面臨同樣問題，因為啲政府人員唔落去地盤，所以情況都係一樣，佢建議政府呢個時候真係要善用科技，例如安排人影相，視像或者無人機拍攝等方式跟進工程，而唔係坐係度咩都唔做，完全停低。